പെറ്റമ്മ ജീവനോടെ കുഴിച്ചിട്ട കുഞ്ഞിനെ രക്ഷിച്ച് നായ

Breaking News International

പെറ്റമ്മ ജീവനോടെ കുഴിച്ചിട്ട നവജാത ശിശുവിനെ രക്ഷിച്ചത് മൂന്ന് കാലുള്ള നായ. തായ്‍ലന്‍ഡില്‍ നിന്നാണ് ഈ ഹീറോ നായയുടെ കഥ. കൗമാരക്കാരി ജന്മം നല്‍കിയ കുഞ്ഞിനെയാണ് ആരും അറിയാതെ കുഴിച്ചിട്ടത്. ഇത് മണത്തറിഞ്ഞ പിങ് പോങ് എന്ന നായ കുഞ്ഞിനെ കുഴിച്ചിട്ട സ്ഥലത്ത് എത്തി മുരളുകയും മണ്ണ് കുഴച്ച് മറിക്കുകയുമായിരുന്നു – ബ്രിട്ടീഷ് ദിനപത്രം ദി ഇന്‍ഡിപെന്‍ഡന്‍റ് റിപ്പോര്‍ട്ട് ചെയ്യുന്നു.

നായയുടെ കുരയും മണ്ണിലെ കളിയും കണ്ട് പരിശോധിച്ചപ്പോഴാണ് ഒരു ശിശുവിന്‍റെ കാല് മണ്ണില്‍ നിന്ന് ഉയര്‍ന്നു നില്‍ക്കുന്നതായി ആളുകള്‍ കണ്ടത്. ഇതോടെ എല്ലാവരും ചേര്‍ന്ന് കുഴിച്ചിട്ട കുഞ്ഞിനെ പുറത്തെടുക്കുകയായിരുന്നു.

കുഞ്ഞിനെ അതിവേഗം ആശുപത്രിയില്‍ എത്തിച്ചതുകൊണ്ട് ജീവന്‍ രക്ഷിക്കാനായി. കുഞ്ഞിന്‍റെ അമ്മയാണെന്ന് കരുതുന്ന പെണ്‍കുട്ടിയെ പോലീസ് കസ്റ്റഡിയില്‍ എടുത്തു. ഇവര്‍ക്ക് എതിരെ കൊലപാതക ശ്രമത്തിന് കുറ്റം ചുമത്തുകയും ചെയ്‍തിട്ടുണ്ടെന്ന് ബ്രിട്ടീഷ് മാധ്യമങ്ങള്‍ റിപ്പോര്‍ട്ട് ചെയ്‍തു.

പെണ്‍കുട്ടിക്ക് പ്രായപൂര്‍ത്തി ആയിട്ടില്ല. അതുകൊണ്ട് നിലവില്‍ ഒരു സൈക്കോളജിസ്റ്റ് ആയിരിക്കും പെറ്റമ്മയോട് സംസാരിക്കുക. ഇതിന് ശേഷമാകും നിയമം ഏത് രീതിയില്‍ വേണം എന്ന് തീരുമാനിക്കുക. കുഞ്ഞിനെ ഏറ്റെടുക്കാന്‍ സന്നദ്ധരായി അറസ്റ്റ് ചെയ്യപ്പെട്ട കുട്ടിയുടെ കുടുംബം തയാറായിട്ടുണ്ട്. എന്നാല്‍ ഇക്കാര്യത്തില്‍ പിന്നീട് മാത്രമേ തീരുമാനം എടുക്കൂ എന്നാണ് പോലീസ് പറയുന്നത്.

READ  'പര്‍ദ്ദ ധരിച്ചെത്തുന്നവരെ വോട്ട് ചെയ്യാൻ അനുവദിക്കരുത്' ; വിവാദ പ്രസ്താവനയുമായി എം വി ജയരാജൻ