ന്യൂഡല്‍ഹി: കഴിഞ്ഞ അഞ്ച് വര്‍ഷത്തിനിടയിലെ ആദ്യത്തെ വാര്‍ത്താ സമ്മേളനത്തില്‍ പങ്കെടുത്ത് പ്രധാനമന്ത്രി നരേന്ദ്ര മോദി. ബിജെപി അധ്യക്ഷന്‍ അമിത് ഷായ്‍ക്കൊപ്പമാണ് മോദി വാര്‍ത്താ സമ്മേളനത്തില്‍ പങ്കെടുത്തത്. ജനങ്ങളോട് നന്ദി പറയാനാണ് എത്തിയതെന്ന് പറഞ്ഞ മോദി, ബിജെപി സര്‍ക്കാര്‍ വീണ്ടും അധികാരത്തില്‍ എത്തുമെന്നും പറഞ്ഞു.
അമിത് ഷായാണ് കൂടുതലും ചോദ്യങ്ങള്‍ നേരിട്ടത്. അമിത് ഷായുടെ വാര്‍ത്താ സമ്മേളനം എന്നാണ് മാധ്യമങ്ങളെ അറിയിച്ചിരുന്നത്. പിന്നീട് മോദി വാര്‍ത്താ സമ്മേളനത്തില്‍ പങ്കെടുക്കുമെന്ന് അറിയിക്കുകയായിരുന്നു. നിരവധി നേട്ടങ്ങള്‍ സര്‍ക്കാര്‍ സ്വന്തമാക്കിയെന്നും അഭിമാനമുണ്ടെന്നും മോദി പറഞ്ഞു. കഴിഞ്ഞ രണ്ട് തെരഞ്ഞെടുപ്പുകളിലും ഐപിഎല്‍ നടത്താന്‍ കഴിഞ്ഞില്ല. ഇത്തവണ ശക്തമായ സര്‍ക്കാര്‍ ഉണ്ടായത് കൊണ്ട് റംസാനും ഐപിഎല്ലും നിരവധി മറ്റു പരിപാടികളും ഒരുമിച്ച് നടത്താന്‍ കഴിഞ്ഞെന്നും മോദി.
